ՍԷՐԸ ՀԱՅ ԳՐԱԿԱՆՈՒԹԵԱՆ ՄԷՋ …

1920224_497643397004358_786428170_n

   Կիրակի, 9 Մարտ 2014ին, Հալէպահայ Գրասէր Ընտրանին ՍԻՐԱԼԻՐ ՀԱՆԴԻՊՈՒՄ մը ունեցաւ Հայ Գրականութեան Սիրոյ երգիչներուն հետ, Հալէպի «Գ.Եսայեան» սրահէն ներս, ուր Համազգայինի «Նիկոլ Աղբալեան» մասնաճիւղի Գրական Յանձնախումբը գեղարուեստական  թովիչ յայտագրով լուսարձակի տակ առաւ «ՍԷՐԸ ՀԱՅ ԳՐԱԿԱՆՈՒԹԵԱՆ ՄԷՋ» եւ հրասանդերով ողողուած առօրեան իսկապէս վերածեց ՍԻՐՈՅ ՏՕՆԻ ··· →

Բոլորին վարձքը կատար:

Թող որ Սէրը ծաղկի իւրաքանչիւրի սրտին եւ հոգիին մէջ…

 «ԳԱՆՁԱՍԱՐ» շաբաթաթերթ

  •  

 ՍԷ՜Ր, ՍԷ՜Ր, ՍԷ՜Ր

 Երէկ, Կիրակի 9 Մարտի յետմիջօրէին, հակառակ նոյն ժամերուն անակնկալօրէն սկսած գարնանային յորդահոս ու տեղատարափ անձրեւին (որ գետերու վերածեց Հալէպի փողոցները ու լիճեր գոյացուց հրապարակներու վրայ…), Գ. Եսայեան հանդիսասրահին մէջ կայացաւ Համազգայինի նախաձեռնած գրական այն որակաւոր ձեռնարկը՝ որուն մասին կը խօսուէր շաբաթներէ իվեր։ «ՍԷՐԸ ՀԱՅ ԳՐԱԿԱՆՈՒԹԵԱՆ ՄԷՋ»։

Բեմին յարդարանքը ինքնին խօսուն էր արդէն։ Պիտի ըսէի՝ ակնախտիղ, այսինքն «աչքը խտղտացնող, աչքը շլացնող», այլ խօսքով՝ հրապուրիչ եւ շքեղ։

Վերջին շրջանին, հակառակ երկիրը պատուհասող ներքին պատերազմին ու անկէ բխող ժխտական բոլոր երեւոյթներուն, Համազգայինի Հալէպի տեղական Նիկոլ Աղբալեան մասնաճիւղը աշխոյժ գործունէութիւն մը կը ցուցաբերէ, ու երէկուան ձեռնարկն ալ օղակներէն մէկն էր մշակութային-գեղարուեստական հաւաքներու այն շղթային՝ որուն մէջ դերեր ստանձնած են մեզի գրեթէ անծանօթ երիտասարդ-երիտասարդուհիներ, բոլո՛րն ալ խանդավառ նոր դէմքեր, բոլո՛րն ալ թարմատի, գրասէր եւ լի՛ զարմանալի հաւատքով ու լաւատեսութեամբ։

Պիտի խնդրէի որ կցուած լուսանկարները սեղմէք ու պահ մը դիտէք պարզուած տեսարանը։ Երգ, երաժշտութիւն, ասմունք, մշակուած խօսք եւ բանաստեղծական վարդագոյն մթնոլորտ։ Ու բոլորին վրայ՝ ՍԷՐ։ Օրուան բանախօսուհին՝ հայերէնաւանդ վաստակաւոր ուսուցչուհի եւ արձակագրուհի տիկ. Լալա Մինասեան, պտոյտի մը առաջնորդեց ներկաները սիրոյ պարտէզներուն մէջ, սկսելով միջնադարեան Քուչակէն կամ Թլկուրանցիէն ու հասնելով մինչեւ Թէքէեան, Մեծարենց եւ ԶարիՖեան, Շիրազ ու Կապուտիկեան։

Այս ձեռնարկին առընչութեամբ, այսօր, Դիմատետրի վրայ, գանատահայ բարեկամ մը նկատել կու տար որ «երանի թէ նմանօրինակ ձեռնարկներ Մոնրէալի մէջ ալ կազմակերպուէին»…։ Այո՛, երանի՜։

Բայց Հալէպի շունչը, Հալէպի հայախօսութիւնը, Հալէպի եռանդն ու կամքը, Հալէպի գրասէր տղոց նուիրումը Մոնրէալի (կամ Փարիզի, Պուէնոս Այրէսի, Աթէնքի ու Սիտնիի) մէջ կարելի՞ է գտնել։

 ԼԵՒՈՆ ՇԱՌՈՅԵԱՆ

2
0



Responses are currently closed, but you can trackback from your own site.

Comments are closed.