ՀԱՅԱՍՏԱՆԻ ՀԱՆՐԱՊԵՏՈՒԹԵԱՆ ՆԱԽԱԳԱՀԻՆ ՆՈՒԷՐՆԵՐԸ

Hayakidagan_Hubados

ՀԱՅԱՍՏԱՆԻ ՀԱՆՐԱՊԵՏՈՒԹԵԱՆ
ՆԱԽԱԳԱՀԻՆ ՆՈՒԷՐՆԵՐԸ

Երկուշաբթի, 11 Ապրիլ 2011-ի յետմիջօրէին, Հ.Հ. Հալէպի գլխաւոր հիւպատոս տիար Աշոտ Մանուկեան եւ հիւպատոսութեան խորհրդական տիար Հրազդան Թոքմաճեան, յատուկ առաքելութեամբ յաջորդաբար այցելեցին Համազգայինի Հալէպի Հայագիտական Հիմնարկն ու Հայ Ծերանոցը։
Յարգելի հիւրերը հանդիպում մը ունեցան Համազգայինի Շրջ. Վարչութեան ատենապետուհի՝ տիկին Հռիփ Կանանեանի, Հ.Հ.Հ. Հիմնարկի Յանձնախումբին եւ տնօրէնուհի օրդ. Ֆիմի Տէր Յակոբեանին հետ։ Տնօրէնուհին մանրամասն կերպով ներկայացուց հիմնարկը՝ հիմնադրութիւնը, ծրագիրը,նպատակը,դասախօսական կազմը, ընդգծելով մէկ կողմէ Հիմնարկին կրթական ծառայութեան կարեւորութիւնը, միւս կողմէ Երեւանի Խաչատուր Աբովեանի անուան պետական մանկավարժական համալսարանին հետ սերտ կապը, ի վերջոյ երախտագիտութեամբ յիշելով Գ. Կիւլպէնկեան Հաստատութեան հայկական բաժնի վարիչ դոկտ. Զաւէն Եկաւեանի նիւթաբարոյական անվերապահ աջակցութիւնը Հիմնարկին։ Գլխաւոր Հիւպատոս տիար Մանուկեան գոհունակութեամբ տեղեկանելէ ետք, իր կարգին ուրախութեամբ յայտնեց, որ Հ. Հ. Վսեմաշուք Նախագահ Սերժ Սարգսեան գնահատելով Համազգայինի Հալէպի Հայագիտական Հիմնարկի Սփիւռքի մէջ հայագիտութեան յառաջդիմութեան համար մատուցած ծառայութիւնները, անձնապէս նուիրաբերած է 5000 ամերիկեան տոլար, որպէս խրախոյս ու քաջալերանք։ Հիմնարկի պատասխանատուները մեծ ուրախութեամբ ու յուզումով ընդունեցին Վսեմաշուք Նախագահի խորիմաստ արժէք ներկայացնող նուէրը եւ իրենց երախտագիտութիւնը յայտնեցին։
Հ.Հ. ներկայացուցիչ յարգելի հիւրերը անմիջապէս այցելեցին Հայ Ծերանոց, ուր դիմաւորուեցան Բերիոյ Հայոց Թեմի Առաջնորդ Գերշ. Տ.Շահան Եպս. Սարգիսեանի,Խնամակալութեան ատենապետ Բժ. Զաւէն Բախտիկեանի, հոգեւոր հովիւ Արժ. Տ. Շնորհք Քհնյ. Տէր Արթինեանի, տնօրէն Բժ. Խաչիկ Ստեփանեանի կողմէ։ Անոնք միասնաբար շրջեցան Ծերանոցի նորակառոյց մասերը։ Սրբազան Հայրը յանուն հայ երեք համայնքապետներուն ու Հայ Ծերանոցի ընտանիքին, ողջունեց յարգելի հիւրերուն մասնայատուկ այցելութիւնը։ Գլխաւոր հիւպատոս տիար Մանուկեան գոհունակութեամբ եւ ուրախութեամբ յայտնեց, որ Հ. Հ. Վսեմաշուք Նախագահ Սերժ Սարգսեան գնահատելով Հայ Ծերանոցի օրինակելի գործունէութիւնը, Ս. Յարութեան (Զատիկի) տօնին առիթով անձնապէս նուիրաբերած է 5000 ամերիկեան տոլար, որպէս աջակցութիւն ու քաջալերանք։ Յիշե՛նք, որ Հայ Ծերանոցի հիւանդանոցի բաժինը իրականացաւ շնորհիւ «Փիւնիկ»ի պատուոյ նախագահ տիար Գաբրիէլ Չէմպէրճեանի եւ գործադիր նախագահ դեսպան Լեւոն Սարգսեանի։ Հայ Ծերանոցի պատասխանատուները անհուն բերկրանքով ու յուզումով ընդունեցին Վսեմաշուք Նախագահի Զատկական նուէրը եւ իրենց երախտագիտութիւնը յայտնեցին։

0
0



Responses are currently closed, but you can trackback from your own site.

Comments are closed.